Drogamendekotasunen prebentzioan egiten den lana urteetan zehar aldatzen joan da eta gai honen inguruan sortzen joan diren beharrizan eta errealitate berrietara moldatzen jakin izan du.

Kontsumo joerak aldatu egin dira, kontsumitzeko moduak aldatu egin dira, substantziak ere aldatzen joan dira… drogen kontu honetan ere modak daude, gauza guztietan bezala.

Hori izan da, hain zuzen ere, esparru honetan lanean diharduten profesionalek izan duten erronka.
Guzti honi, urte guzti hauetan egindako lanak emandako esperientzia gehitu behar zaio, honek erakutsi baitigu zeintzuk ziren estrategia egokienak, hartzaileei gehien heltzen zaizkien mezuak eta zeintzuk ez ziren eraginkorrak eta beraz, baztertu beharrekoak.
Hau honela, drogamendekotasunen prebentzioan, 80. eta 90. hamarkadetan hain ohikoak ziren drogei ez borobila esatearen mezuak arriskuen eta kalteen murrizketara zuzendutako beste batzuengatik aldatu izan dira.

Aldaketa hau nolakoa izan den ikusteko aukera paregabea dugu orain Bilbon, non FAD-ek -Drogamendekotasunaren aurkako laguntzarako elkarteak- erakusketa bat antolatu du “25 urte baino gehiago, 50 kanpaina baino gehiago” lemapean. Erakusketa honek FAD-ek 1988 urtetik gaur egunera arte drogen kontsumoei buruz garatu izan dituen sentsibilizazio kanpainen iragarkiak biltzen ditu eta espainiar estatuan drogen kontsumoak azkenengo 30 urteetan izan duen bilakaeraren azterketa historikoa da.

Erakusketa hau dohainik ikusi daiteke ekainaren 16ra arte Bilboko Zabalgune edo “Ensanche” eraikinean (Zabalgune plaza, 11) astelehenetik ostiralera goizeko 9etatik arratsaldeko 8etara.

Urte guzti hauetan gauzatu izan dien sentsibilizazio kanpainetan zabaldutako mezuen forma eta edukinetan aldaketa asko eman diren arren, beti mantendu izan da funtsezko ideia bat, aldaketarik gabe, moden eraginetatik at geratu den ideia: heziketaren garrantzia drogekin elkarbizitzen ikasteko.
Heziketa, eskolan baita ere, baina batez ere familian oinarrizkoa da prebentzio lanean. Kanpaina askok, programa askok eta esku hartze askok azkenengo hamarkadetan bilakaera itzela jasan dute baina familiekin lan egitea esku hartze garrantzitsuenetarikoa delako ikuspegiak inoiz baino indar gehiago du, familiak seme-alabak haurtzarotik babes faktoreetan hezi ditzan -autoestimua, enpatia, asertibitatea,…- drogen kontsumoen eta beste arrisku portaera batzuen aurrean hain zaurgarriak izan ez daitezan.